ខោនដោន

ខោនដោន

ខោនដោនផ្ដាច់ឆ្នាំ២០១៩ចូល២០២០

ម៉ោង៨ជាងហើយម្ដេចក៏មិនទាន់ឃើញបងវិបុលមកយកទៀត ឯងចាំឡើងចង់រលុបម្សៅក្រេមអស់ទៅវិញហើយ និយាយគ្នាថាម៉ោងប្រាំបី ឥឡូវម៉ោងប្រាំបីជាងហើយមិនទាន់មកទៀត។

អ្នកមានសង្សារកុំប្រញាប់ កុំប្រញាប់! ធ្វើការងារឱ្យហើយសិន សឹមទៅ ផ្ទះហើយនាំសង្សារដើរលេងដាច់យប់បាន បើដាច់យប់ហើយកុំភ្លេចចូលសួរសុខទុក្ខផ្ទះអ៊ំណាក់។ កាដូក្ស៍ធំៗ ដូចវិបុលអីចឹង ត្រូវតែបានវើយ កុំភ្លេច! បើថាអាចប្រើស្រោមផង កុំធ្វើបាបកូនគេពេក ត្រឹមពីរដងបានហើយ។ នេះជាសំឡេងដែលមនុស្សនៅកន្លែងធ្វើការនិយាយចម្អន់គ្នាលេង។ _ទៅសិនហើយបង រីករាយឆ្នាំថ្មី! -ទៅចុះបុលអ្ហ៊ើយ តែកុំភ្លេចបណ្ដំគ្រូមុខក្រាស ដៃរហ័ស ចិត្តហ៊ាន ដឹងតែបានហើយ។ សំឡេងសើចក៏លាន់ឮឡើង ចំណែកសំឡេងម៉ូតូក៏ជាសញ្ញាប្រាប់ថាវិបុលចេញទៅជួបសង្សារគេដែរ។ សំឡេងស៊ីប្លេមិនដាច់សោះ ព្រោះស្ទះផ្លូវ ទូរសព្ទក៏តេមិនចូល យី!ថ្ងៃនេះប្រព័ន្ធទូរសព្ទអីក៏យ៉ាប់ម៉្លេះ។ ដឹងតែខឹងឯងហ្មង ហើយប្រាប់តាមត្រង់ក៏នៅតែមិនជឿដែរ ចប់ហ្មង។

ប៉ុន្មានដងហើយ នៅកន្លែងការងារគាត់ មិនដឹងជាស្អីទេះ ឱ្យតែថ្ងៃហ្នឹងដឹងតែថែមម៉ោងរហូត។ 

_យេ...! រីករាយឆ្នាំថ្មី។ 

-គេចាំឡើងផ្សារភ្នែកហើយ។

_មានលក់អីខ្លះផ្សារភ្នែកហ្នឹង?

-មើល៍ គេសួរ?

ដៃហុចកាដូក្ស៍អបដោយសម្ដី រីករាយឆ្នាំថ្មីទៅសង្សារ។

-មិនមែនរីករាយឆ្នាំថ្មី អ្វីៗថ្មី សង្សារក៏ថ្មីដែរទេអី?

_អ្វីថ្មីបាន តែសង្សារមិនអាចថ្មីទេ។ តោះ! ទៅ ទៅណាមុន?

សង្សារគេពីរនាក់នាំគ្នាដើរលេងនៅតាមផ្សារទំនើប នៅតាមមាត់ទន្លេ នៅតាមកន្លែងញ៉ាំអី ចាំទាល់តែដល់ម៉ោងជិតដប់ពីរអាធ្រាត្រទើបគេនាំគ្នាទៅណាហ្កា ដើម្បីមើលកាំជ្រួច និងរាប់ថយក្រោយរួមគ្នា ពួកគេទៅដល់ឮសំឡេងស្រែក ០២ ០១ ០០។ ពិតជារំភើបមែន។ អ្វីៗត្រូវបានបញ្ចប់អស់ហើយ។ មនុស្សម្នាក៏ចាប់ផ្ដើមចេញពីកន្លែងរាប់លេខ មើលកាំជ្រួច ខ្លះទៅផ្ទះ ខ្លះបន្តទៅកន្លែងផ្សេង ខ្លះក៏មិនទាន់ចេញភ្លាមៗទេ ចាំដល់ពេលរាងអន់ស្ទះបន្តិច។

អ្នកលក់ អ្នកទិញ អ្នកចូលរួម អ្នកផ្សេងៗ សុទ្ធតែសប្បាយរីករាយដូចៗគ្នា គ្រាន់តែមូលហេតុនៃការរួសរាយខុសគ្នាប៉ុណ្ណោះ។

ញ.ផល្លី សុផេន
០១ មករា ២០២០